ខេត្តកំពង់ធំ៖ កាលពីថ្ងៃទី២៦ ខែធ្នូ ឆ្នាំ២០២៤ មានការប្រឈមមុខដាក់គ្នារវាងក្រុមក្មេងទំនើងពីរក្រុមនៅនៅភូមិ ថ្មសំលៀង ឃុំក្រយា ស្រុកសន្ទុក ឈានទៅដល់ការប្រើហិង្សា បណ្តាលឲ្យខូចខាតម៉ូតូ១គ្រឿង ដែលជារបស់បក្សពួក។ ថ្វីដ្បិតតែមានការឈ្លោះប្រកែកគ្នាយ៉ាងខ្លាំងក៏ដោយ មិនមានអ្នករងរបួសធ្ងន់ធ្ងរនោះទេ ។

មន្ត្រីអនុវត្តច្បាប់បានអន្តរាគមន៍ និងចាប់ខ្លួនមនុស្ស៥នាក់ដែលពាក់ព័ន្ធក្នុងហេតុការណ៍នេះ ខណៈខ្លះទៀតបានរត់គេចពីកន្លែងកើតហេតុ។ ក្នុងចំណោមអ្នកដែលត្រូវបានចាប់ខ្លួននោះ មានជនសង្ស័យម្នាក់អាយុទើបតែ១២ឆ្នាំ និងម្នាក់ទៀតអាយុ១៣ឆ្នាំ។

ដោយយោងតាមច្បាប់ការពារអនីតិជន សមត្ថកិច្ចសម្រេចនាំជនសង្ស័យវ័យក្មេង ចូលទៅមើល បន្ទប់ឃុំឃាំង ក្នុងពន្ធនាគារ ខេត្តកំពង់ធំ។ មន្ត្រីតុលាការបញ្ជាក់ថា នោះមិនមែនជាវិធានការដាក់ទណ្ឌកម្មនោះទេ ប៉ុន្តែ ជាមធ្យោបាយអប់រំ និងរារាំងពួកគេពីការប្រព្រឹត្តខុសនាពេលអនាគត។

ដោយឡែង ក្រុមក្មេងទំនើងបីនាក់ទៀត ដែលមានអាយុលើសពី ១៤ឆ្នាំ តុលាការបង្ហាញថាពួកគេនឹងចាត់វិធានការតាមច្បាប់យ៉ាងតឹងរ៉ឹងដោយអនុលោមតាមច្បាប់។ ទន្ទឹមនឹងនោះ កម្លាំងជំនាញកំពុងបន្តស្រាវជ្រាវរកមុខសញ្ញាជនសង្ស័យដែលរត់គេចខ្លួន ដោយមានផែនការរៀបចំសំណុំរឿងបញ្ជូនខ្លួនមកផ្តន្ទាទោសតាមច្បាប់៕